29 Января 2015

Елена Борохитовагай концерт-наадан

«ЗYРХЭНДЭМНИ ГАНСАЛШИ»

Мүнөө үеын харагшад болон шагнагшадта мэдээжэ боложо ябаhан дуушан Елена Борохитовагай иимэ нэрэтэй тоглолтодо уулзалга хоёр hарын 10-да Н. Бестужевай нэрэмжэтэ Ород драмын театрай танхим соо болохоор хүлеэгдэнэ.

Дуулажа захалhаар туйлажа гараhан амжалтануудынь тэрэнэй нэрые эли тодо үргэнэ. 1997 ондо Буряадай телевидениин үнгэргэжэ байдаг «Сагаан hара» гэhэн дуушадай мүрысөөндэ I шатын илагша боложо тодорhон, тэрэ гэhээр олон тоото харалга мүрысөөнүүдтэ амжалта түгэс хабаадалсажа ябадаг юм. 2008 ондо Бүгэдэ Буряадай Эрхүүдэ үнгэргэhэн «Алтаргана» нааданда тэрэнэй хүртэhэн эгээ Ехэ шагнал бэлигэйнь жэлhээ жэлдэ ургажа ябаhые гэршэлнэ. Буряадай Оперын ордон соо «Нарамни» гэhэн дуунуудайнгаа сахим согсолбориин нара хараhан ушараар дэлгэhэн тоглолтонь олоной сэдьхэлдэ хадуугдан үлэнхэй.

Елена Борохитова хүгжэмэй талаар мэргэжэлээ Эрхүү хотын хүгжэмэй hургуулида hуража олоhон, энэл мэргэжэлээрээ Москвагай Гүрэнэй академидэ hуража гараhан байха юм.

Мүнөө үедэ Елена Борохитова тоглолтонуудые дэлгэжэ ябахынгаа хажуугаар П. Чайковскийн нэрэмжэтэ урлалай hургуулида багшалжа байдаг.

Февралиин 10-да үнгэрхэ тоглолтодо дулма Сунрапова, Юлия Будаева гэгшэдэй бэшэhэн дуунууд, өөрынь бэшэhэн хүгжэмтэ зохёолнууд зэдэлхэ. Залуу дуушаниие дэмжэжэ мэдээжэ дуушад Чингис Раднаев, Зоригто Нонна Тогочиевтан, Дулма Сунрапова, «Байгал» театрай «Каппучино» бүлгэмэй хатаршад хабаадаха.